BAO LA MAPEMA KUMDHURU MOURINHO

Huenda ukawa ni wakati mgumu sana kuwahi kutokea katika maisha ya kufundisha soka ya mtaalam wa ufundi Mreno Jose Mourinho baada ya kupata sare nne mfululizo katika dimba la nyumbani Old Traford.Bao la Diafra Sakho wa West Ham sekundi ya 90 dhidi ya Manchester United ni moja ya mabao ya haraka zaidi katika historia ya Ligi kuu ya Uingereza EPL. Bao hilo liliwachanganya wachezaji wa United na kupelekea kutoa sare ya 1-1 dhidi ya West Ham ambapo mechi hiyo huenda ikaacha adhabu kwa kocha Jose Mourinho.

Mourinho sasa anakabiliwa na adhabu ya kufungiwa mechi mbili baada ya kutolewa kwenye eneo lake kwa mara ya pili ndani ya mwezi mmoja. Hata hivyo pamoja na Mourinho kuwa hatihati kufungiwa bado sare hiyo ya 1-1 na West Ham United imeingia kwenye historia ikiwa ni ya nne mfululizo katika uwanja wa Old Trafford kwa mara ya kwanza ndani ya miaka 36.Mourinho aliondolewa kwenye benchi kutokana na Utovu wa nidhamu kwa mwamuzi baada ya Paul Pogba kujirusha kisha kupewa kadi ya njano ambapo Mreno huyo alidai mchezaji wake ameonewa ndipo mwamuzi wa nne Jonathan Moss alimwamuru Jose Mourinho kuondoka kwenye eneo la ufundi kuanzia dakika ya 60.